Заря духи стоит покупать духи.

Из почты "СК"

ПОСЛЕДОВАНИЕ МОЛЕБНАГО ПЕНИЯ*
КО ГОСПОДУ БОГУ НАШЕМУ, ЗА (БУДУЩЕГО)** ИМПЕРАТОРА
И ЗА ЛЮДИ, ПЕВАЕМАГО ВО ВРЕМЯ БРАНИ
ПРОТИВ СУПОСТАТОВ

Возгласившу архиерею, или иерею: Благословен Бог наш:
Чтец: Слава Тебе, Боже наш, слава Тебе: Царю Небесный: Трисвятое. Отче наш: Господи, помилуй, 12. Слава, и ныне: Приидите, поклонимся: трижды.

Посем певцы поют по клиросам:

С нами Бог, разумейте языцы и покаряйтеся: Яко с нами Бог. Услышите до последних земли: Яко с нами Бог.Могущие покаряйтеся: Яко с нами Бог. Аще бо паки возможете, и паки побеждени будете: Яко с нами Бог. И иже аще совет совещаваете, разорит Господь: Яко с нами Бог. И слово, еже аще возглаголете, не пребудет в вас: Яко с нами Бог. Страха же вашего не убоимся, ниже смутимся: Господа же Бога нашего Того освятим, и Той будет нам в страх: Яко с нами Бог. И аще на Него надеяся буду, будет мне во освящение: Яко с нами Бог. И уповая буду на Него, и спасуся Им: Яко с нами Бог. Се аз и дети, яже ми даде Бог: Яко с нами Бог. Людие ходящии во тьме, видеша свет велий: Яко с нами Бог. Живущии во стране и сени смертней, свет возсияет на вы: Яко с нами Бог. Яко Отроча родися нам, Сын, и дадеся нам: Яко с нами Бог. Егоже начальство бысть на раме Его: Яко с нами Бог. И мира Его несть предела: Яко с нами Бог. И нарицается имя Его, велика совета Ангел: Яко с нами Бог. Чуден советник: Яко с нами Бог. Бог крепок, Властитель, Начальник мира: Яко с нами Бог. Отец будущаго века: Яко с нами Бог. С нами Бог, разумейте языцы и покаряйтеся: Яко с нами Бог. Слава Отцу и Сыну и Святому Духу. С нами Бог, разумейте языцы и покаряйтеся: Яко с нами Бог. И ныне и присно и во веки веков, аминь. С нами Бог, разумейте языцы и покаряйтеся: Яко с нами Бог.

Диакон же чтет ектению обычную:  Миром Господу помолимся (Лик: Господи, помилуй.) и прочая, даже до: О плавающих: Таже прилагает и сия: О еже лук медян положити мышцы верных Своих, и укрепити десницу их силою крепости Своея, в побеждение и попрание супостат наших, Господу помолимся.

Лик: Господи, помилуй.

О еже неослабну, непребориму, победительну же силу, крепость и мужество с храбростию христоименитому воинству нашему, на сокрушение врагов и супостат наших, и всех хитрообразных их наветов, подати, Господу помолимся.

Лик: Господи, помилуй.

О еже студа и безчестия лица противящихся нам исполнити, сердце же их страха и ужаса, и Ангел Господень да будет погоняяй и поражаяй их, Господу помолимся.

Лик: Господи, помилуй.

О еже посрамити крестоненавистное супостат наших царство, и прославити силою крестною в победе (будущего) Крестоноснаго ИМПЕРАТОРА, и люди своя, Господу помолимся.

Лик: Господи, помилуй.

О еже услышати от Церкве Святыя Своея вопль и воздыхание единоверных наших, и врагов и супостат порабощенных рабов Своих, в печали и скорби своей к Нему вопиющих, и извести от тли живот их, Господу помолимся.

Лик: Господи, помилуй.

Заступи, спаси, помилуй и сохрани нас:

Лик: Господи, помилуй.

Пресвятую, Пречистую, Преблагословенную:

Лик: Тебе Господи.

Архиерей, или иерей возглашает: Яко подобает Тебе всякая слава:

Лик: Аминь.

Посем, Бог Господь, и явися нам: со стихи на глас 1-й.

Тропарь, глас тойже:

Спаси, Господи, люди Твоя, и благослови достояние Твое, победы (будущему) Благоверному ИМПЕРАТОРУ нашему на сопротивныя даруя, и Твое сохраняя Крестом Твоим жительство.

Слава, тойже. И ныне, Богородичен:

Предстательство страшное и непостыдное, не презри, Благая, молитв наших, Всепетая Богородице, утверди православных жительство, спаси (будущего) Благовернаго ИМПЕРАТОРА нашего, Емуже повелела еси царствовати, и подаждь Ему с Небесе победу, зане родила еси Бога, едина Благословенная.

Таже, диакон: Вонмем:

Архиерей, или иерей: Мир всем.

Чтец: И духови твоему.

Диакон: Премудрость, вонмем.

Чтец: прокимен, глас 4:

Господи, силою Твоею возвеселится Царь, и о спасении Твоем возрадуется зело.

Стих: Желание сердца его дал еси ему, и хотения устну его неси лишил его.

Посем чтет апостол, 2 к Коринфяном: (зачало 172:)

Братие, Богу благодарение, всегда победители нас творящему о Христе Иисусе, и воню разума Его являющу нами во всяком месте. Яко Христово Благоухание есмы Богови, в спасаемых и погибающих. Овем убо воня смертная в смерть: овем же воня животная в живот. И к сим кто доволен? Царю же веков Нетленному, Невидимому, Единому, Премудрому Богу, честь и слава во веки веков, аминь.

Архиерей, или иерей: Мир ти. Чтец: И духови твоему.

Диакон: Премудрость, прости услышим Святаго Евангелия.

Архиерей, или иерей: Мир всем.

Лик: И духови твоему.

Архиерей, или иерей:

От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Архиерей, или иерей, чтет Евангелие от Матфея, (зачало 20 от полу.)

Рече Господь: просите, и дастся вам: ищите, и обрящете: толцыте, и отверзется вам. Всяк бо просяй приемлет, и ищяй обретает, и толкущему отверзется. Или кто есть от вас человек, егоже вопросит сын его хлеба, еда камень подаст ему? Или аще рыбы просит, еда змию подаст ему? Аще убо вы лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Лик: Слава Тебе, Господи, слава Тебе.

Диакон: Помилуй нас, Боже, по велицей милости Твоей, молимся Ти, услыши и помилуй.

Лик: Господи, помилуй, трижды.

Еще молимся о (будущем) Благочестивейшем, Самодержавнейшем, Великом Государе ИМПЕРАТОРЕ всея России: о державе, победе, пребывании, мире, здравии, спасении Его, и Господу Богу нашему наипаче поспешити и пособити Ему во всех, и покорити под нозе Его всякаго врага и супостата.

Лик: Господи, помилуй, трижды.

Еще молимся о Великом господине и отце нашем Святейшем Патриархе Алексие, и о господине нашем или Высокопреосвященнейшем митрополите (или архиепископе, или епископе ) (имярек, егоже область) и всей во Христе братии нашей.

Лик: Господи, помилуй, трижды.

Еще молимся о всем Христолюбивом воинстве.

Лик: Господи, помилуй, трижды.

Не на лук наш уповаем, ни оружие наше спасет нас, Господи, но Твоея всемогущия помощи просим, и на Твою силу дерзающе, на враги наша ополчаемся, и имя Твое верно призывающе, со умилением молим Ти ся: Всемогий Господи, милостивно услыши и помилуй.

Лик: Господи, помилуй, трижды.

Защитниче правоверных, посли стрелы Твоя, Господи и смятение сотвори врагом нашим, блесни молния, и разжени я: посли руку Твою свыше, и покори их, и в руки верному Твоему воинству, и (будущему) ИМПЕРАТОРУ нашему предаждь, молим Ти ся, услыши и помилуй.

Лик: Господи, помилуй, трижды.

Во веки пребываяй, Милосерде Господи, запрети языком в достояние Твое приходящим и оскверняющим Церковь Святую Твою: пожени их бурею Твоею, и гневом Твоим смути их, исполни лица их безчестия, да постыдятся и смятутся в век века, да посрамятся и силою судеб Твоих гордость их да сокрушится, имя же Твое Святое да прославится в нас, прилежно молим Ти ся, услыши и помилуй.

Лик: Господи, помилуй, трижды.

О еже непреобориму и победительну всегда над христоненавистными враги быти (будущему) Благочестивейшему, Самодержавнейшему Государю ИМПЕРАТОРУ всея России, и правоверному Его воинству, и мир и славу вселити в земли нашей, прилежно молим Ти ся, Господи, услыши и помилуй.

Лик: Господи, помилуй, трижды.

Архиерей же, или иерей возглас: Услыши ны, Боже Спасителю наш:

Лик: Аминь.

Диакон: Со умилением преклонше колена, Господу помолимся.

Лик: Господи, помилуй.

Архиерей же, или иерей, преклонив колене, со всяким вниманием и умилением чтет молитву сию велегласно:

Господи Боже наш, послушавый Моисея, простерша к Тебе руце, и люди Израилевы укрепивый на Амалика, ополчивый Иисуса Навина на брань, и повелевый солнцу стати: Ты и ныне, Владыко Господи, услыши нас молящихся Тебе: укрепи силою Твоею (будущего) Благочестивейшаго, Самодержавнейшаго, Великаго Государя нашего ИМПЕРАТОРА: благослови Его дела: умножи славу Его победами над противоборствующими Православной Церкви: утверди всесильною Твоею десницею царство Его: сохрани воинство Его: посли Ангела Твоего укрепляюща их. Отъими от них всяк глад и пагубу, и избави я от огня и меча и нападения враг, и от всякаго востания противнаго: подаждь им вся, яже ко спасению прошения, спутешествуя им во всем. Посли, Господи, невидимо десницу Твою, рабы Твоя заступающую во всех: яко Твоя держава, Царство и сила, от Тебе помощь вси приемлем, на Тя уповаем, Тебе славу возсылаем, Отцу и Сыну и Святому Духу, ныне и присно, и во веки веков.

Лик: Аминь.

Диакон: Премудрость.

Лик: Честнейшую херувим: Слава, и ныне: Господи, помилуй, трижды. Благослови.

Архиерей же, или иерей творит обычный дневный отпуст.


*Печатается по изданию: “Последование молебных пений”. АО

“Санкт-Петербургская типография №6” 1996

**Будущего – слово в текст вставлено самопроизвольно, потому взято в скобки.

Может быть заменено словом – грядущего.